Li DYAyê 2 zanîngehên din beşdarî xwepêşandanên Xezzeyê bûn
PeyamaKurd – Xwendekarên ku li zanîngehên Georgetown û George Washington ên paytext Washingtonê dixwînin jî beşdarî protestoyên "bertekên li dijî êrîşên Îsraîlê yên li ser Xezzeyê" bûn ku li kampusên zanîngehê yên li seranserê welêt li Dewletên Yekbûyî yên Amerîkayê belav bûn.
Hin xwendekarên zanîngehên Georgetown û George Washington ku du zanîngehên pêşeng ên Dewletên Yekbûyî yên Amerîkayê ne, serê sibê li baxçeyên kampusên xwe kom bûn.
Bi sedan xwendekar li baxçeyê mezin ê li navenda kampusa sereke ya Zanîngeha Georgetownê li hev civiyan û dirûşmên "Fîlîstîna Azadî" û "Li Xezzeyê agirbesta lezgîn" berz kirin. Hin xwendekar li qadên ku polîsan destûr bi sînor dane kon vedan.
Xwendekarên ku bi pankartên di destên xwe de li hemberî êrîşên Îsraîlê yên li Xezzeyê bertek nîşan dan, piştre bi girseyî ber bi kampusa Zanîngeha George Washington (GW) ve dest bi meşê kirin.
Bi sedan xwendekar li baxçeyê kampusa sereke ya Zanîngeha George Washington ku yek ji mezintirîn zanîngehên paytextê ye li hev civiyan û bi qîrîna dirûşmeyan piştgiriya xwe ya ji bo Xezzeyê anîn ziman.
Xebatkarên ewlekariyê yên GWê li derdorê tedbîrên ewlehiyê girtin û ji nûnerên xwendekaran re ragihandin ku ew dikarin serê sibê saet di navbera 07.00 û 19.00an de li kampusê xwepêşandanan bikin û li derveyî van saetan destûr nayê dayîn ku xwepêşandan bên lidarxistin.
Tê çaverêkirin ku hejmara xwendekarên ku xwe amade dikin li baxçeyê konan vekin zêde bibe û weke li kampusên zanîngehên din heta demekê xwepêşandan berdewam bikin.
