image

بەڕێز قادری حاجی عەلی كە قیادەیەكی حزبی تەغییرە لە دەستەوەاژەی ئیرهابی فكری ناراحەتە و پێیوایە كە خەڵك ترسی لە ڕەخنە هەیە و ڕەخنەگرتن لە گەندەڵی بە ئیرهابی فكری دەزانن. بەر لە هەموو شتێك ئەو بەڕێزە نابێ لەبیر بكات كە ئەوان خۆیان بەشێكن لە گەندەڵی و مەحروومكردنی دەڤەری سلێمانی. لەگەڵئەوەیشدا با وەك نەعامە خۆی لە بینینی ڕاستیەكان نەشارێتەوە. دەبێ لەوە تێبگەن لە كاری نۆساڵەی حزبەكەی چ كارەساتێك لە سلێمانی دروست بووە و چۆنچۆنی مرۆڤی كوردی لەو دەڤەرەدا هەڵتەكێندراوە. ئیرهابە فكرییەكەی ئەوان تەنیا ئەو كڵێشە بچووكە نییە كە لە ڕەخنەی مەدەنیدا بچووك بكرێتەوە بەڵكو ئیرهابی فكری تەوژمێكە بۆ شێواندنی ڕاستییەكان، خۆدزینەوەیە لە بەرپرسیارێتی، بەدێوكردنی ئەویتر و فریشتەكردنی خود لە هیچوخۆڕایی.
ئیرهابی فكری چوارچێوەیەكی هزری و كرداریی ئاراستەكراو و مونەزەمە، لەچەشنی فاشییەت و بەعس و داعشباوەڕی و نەژادپەرستی.
لەم ئیرهابە فكرییەدا میدیا و مەكینەكانی هۆنینەوەی درۆ و پڕۆپاگەندە و ژمارەیەك قەڵەم و عەقڵ كەوتوونەتە كار بۆ ئەوەی مانای ڕاستییەكان بشێوێنن.
كار لەسەر سپیكردنی ڕەش و ڕەشكردنی سپی دەكەن. لە ئیرهابی فكریدا دوو ڕەنگ هەیە ڕەنگی سێیەم نییە.
لە ئیرهابی فكریدا فەشەلی سیاسی و كۆمەڵایەتی و ئابووری و كوولتووری و ئەخلاقی لایەنێك دەخرێتە ئەستۆی لایەنێكی تر كە دەستی لەو فەشەلەدا نەبووە.
لە ئیرهابی فكریدا ئەوەی پێچەوانە بیر بكاتەوە كۆیلە و ناپاك و خۆفرۆشە. بە ئاسانی سووكایەتی بە خەڵك دەكرێت، بە جنێو وەڵامی ڕكابەر دەدرێتەوە، تەخوین دەكرێت. لە ئیرهابی فكریدا پەیوەندیی نێوان تاكەكان دەشێوێت، مرۆڤەكان بەشێوەیەكی دیكە لە چەمكی ئازادی و نان و دیموكراسی و مرۆڤ دەگەیێنرێن.
لە ئیرهابی فكریدا مرۆڤ ناچار دەكرێت گرژ و هەڵچوو و توندوتیژ بێت و دژی ئازادیی خۆی بجەنگێت، مرۆڤ فێری زبرگۆیی دەبێت، تەنگەنەفەسە و جاهیل، وا دەزانێ حەقیقەت تەنیا لەنێو جانتاكەی ئەودا دەدۆزرێتەوە.
ئیرهابی فكری فكرێكی ڕێكخراوە بۆ دژایەتیكردنی مرۆڤ و سەربەستییەكەی. ئا ئەمە گلەیی خەڵك و چاودێرانە لە ئەدای حزبەكەیان و دەبێ قبووڵیشی بكەن كە مامەڵەیەكی خەراپیان لەگەڵ هزروهۆشی خەڵكی سلێمانیدا كردووە.

هەموو ئەوانەی سەنگەریان لە سەربەخۆیی و ڕیفراندۆم گرتووە لە كردار و لە ئایدیۆلۆژیدا خەڵكی نادیموكرات و توندئاژۆ و بشوێنەخوازن. داهێنەری ئیرهابی فكریین، بۆ كوردستان و بۆ سلێمانی داریان لەسەر بەرد نەناوە. هەمیشە بیریان لە تێكدان كردووە، ئێرەیی و ڕق و تەنگەنەفەسی هەوێنی هەموو لێكدانەوەكانیان بووە. 
ئەو هەرزە سیاسییە كوردانەی لە دوژمن دڕتر سەنگەریان لە سەربەخۆیی و مافی گەل گرتووە با پرسیار لەخۆیان بكەن چیان كردووە بۆ ئەم وڵاتە؟
كام سەروەری و شانازییە كە بۆ كوردستان وەدەستیان هێناوە؟
جگە لە فەوزا و سەرلێشێواویی چییان بۆ سلێمانی كردووە؟ خۆ دەستەڵات و ژێرخان و سەرخانی سلێمانی خۆیانن.. جگە لە ئەسیركردنی سلێمانی چییان بۆ ئەم شارە كردووە؟
بۆ كولتوور و فەرهەنگ و ئەدەب چیان بۆ كورد كردووە؟ هەر ئەوانن داهێنەری جنێودان و شەڕی دەروونی و ئیرهابی فكری لەدژی هەر كەس وەك ئەوان بیر نەكاتەوە.
كامیان ستەمكارە؟ ئەوەی خوێن دەدات بۆ خاك و وەتەن و هەموو بەرپرسیارێتییەك دەخاتە سەر شانی یان ئەوانەی فاشیست و ناوچەگەران؟ ئەوانەی منداڵ دەسووتێنن و بیر لە كونسوڵكوشتن دەكەنەوە؟ 
كامیان مەدەنی و پێشكەوتنخوازن؟ ئەوەی بیەوێ گەلەكەی بە جەهل و تایفەگەریی خەزعەلی و داعش و مالكی ببەستێتەوە یان ئەوەی دەیەوێ كوردستان بە جیهانی ئازاد ببەستێتەوە؟ 
ئەوەی تازە بە تازە بت و گۆڕپەرستی و تابۆ دروست دەكا، ئەوەی حەزی لە پاشكۆیی وڵاتێكە گەلەكەی چەوساندووەتەوە، ئەوەی تەنیا دوو ڕەنگ ئەبینێ و پەلاماری بیروڕای جیاواز دەدا، ئەوەی ئیرهابی فكری تاوی دەدا، ئەوەی داعشباوەڕە و خەون بە ئیمارەت و ویلایەت ئەبینێ، هەر ئەوەی لێ چاوەڕێ دەكرێ كە دژی ئازادیی گەلەكەی بجەنگێ.