image

چەكدارانی رێكخراوی تیرۆریستی تالیبان، لە چەند میحوەرێكەوە هێرشیان كردە سەر ناوەندی شاری فەراهی پایتەختی ویلایەتی فەراهی ئەفغانستان و ناوەندی پارێزگاکەیان كۆنترۆڵ کردووە.

ئاژانسی بی بی سی لەزاری فەرید بەختور سەرۆكی ئەنجومەنی فەراهییەوە بڵاویکردووەتەوە، کە چەكدارانی تالیبان بەشێكی شارەكەیان كۆنترۆڵكردووە و ئێستا جەنگێكی سەخت لەنێوان سوپا و چەكدارەكان لە ئارادایە. 

لای خۆشیانەوە چەكدارە تیرۆریستەکانی تالیبان لە تۆڕە كۆمەڵایەتییەكانەوە  كۆمەڵێك وێنەیان بڵاو كردووەتەوە كە دەری دەخەن ئەوان دەستیان بەسەر شارەكەدا گرتووە.

هاوکات لە بەیاننامەیەكدا وەزارەتی بەرگریی ئەفغانستان، دڵنیایی داوەتە هاووڵاتیانی ویلایەتەكە كە لێ ناگەڕێن تالیبان لەو شەڕەدا سەركەوتوو بێت و رێوشوێنی پێویست بۆ رووبەڕووبوونەوەیان گیراوەتەبەر.

وەزارەتی بەرگریی ئەفغانستان، ئاماژەی بەوەشکردووە، كە لە رێی هێرشی ئاسمانی و وشكایی و بەكارهێنانی سەرجەم هێزە تایبەتەكانی، رووبەڕووی چەکدارە تیرۆریستەکانی تالیبان دەبێتەوە.