image


پەیامی کورد... ڕێکخراوی موجاهیدینی خەلق، بەرپرسایەتیی هێرش بۆ سەر بنکەی بەسیج لە تارانی وە ئەستۆ گرت

ڕاگەیاندنەکانی سەر بە ڕێکخراوی موجاهیدینی خەلق، لەسەر بنکەی بەسیجی تاران ڕایانگەیاند کە، ئەو بنکەیە دەورونەخشێکی گرنگی لە سەرکوتی خەڵکی ناڕازیی تاران هەبووە.

ڕێکخراوی موجاهیدینی خەلق، پاش بڵاوبوونەوەی ڤیدیۆ گەلێک لە تۆڕە کۆمەڵایەتییەکان سەبارەت بە چەندین تەقینەوەی بەهێز لە پایگای بەسیجی» مالکی ئەشتەر» لە تاران، ڕۆژی شەممە ٢ی تەمووزی ٢٠٢٢ لە بەیاننامەیەکدا ڕایگەیاند کە بەهۆی دەورونەخشی ئەو بنکەی بەسیجە لەسەر کوتی خەڵکی ناڕازیی تاران، هێرشی کردووەتە سەر ئەو مۆڵگەیەی ڕژێم.

هەرلەم پێوەندییەدا ڕاگەیاندنەکانی سەر بەو ڕێکخراوە ئۆپۆزیسیۆنە ئێرانییە، هێرش بۆ سەر ئەو بنکەیەیان لە درێژەی هێرشەکانی دیکەدا ناو برد و ئاماژەیان بە هێرشەکانی پێشووی ئەو ڕێکخراوەیە بۆ سەر ناوەندەکانی بەسیج، حەوزەکانی عێلمیە و قەرارگاکانی سپای تێرۆریستی پاسدارانی ڕژێم کردووە.

جێگەی ئاماژەیە کە ڕێکخراوی موجاهیدینی خەلق، پێشتریش هێرشانێکی کردبووە سەر ژێرخانە ئابوورییەکانی شارەوانی تاران و کەناڵە تەلەڤزیۆنییەکانی دەنگ و ڕەنگی ڕژێم.