بە تۆمەتی دژایەتیکردنی لەشکرکێشی سوپای تورکیا بۆ سەر عەفرین، لە سەرەتای دەستپێکردنی ئۆپراسیۆنەکەوە هێزە ئەمنییەکانی تورکیا، تائێستا لەناوچە جیاجیاکانی ئەو وڵاتە (٧٨٦) کەسیان دەستگیرکردووە.

لەراگەیەندراوێکدا وەزارەتی ناوخۆی توركیا بڵاویکردووەتەوە، کە لەهەفتەی رابردوودا هێزە ئەمنییەكانی وڵاتەکەی بەپشتیوانی هێزەكانی وشكانی و ئاسمانی، هەزار و (١٠٣) ئۆپەراسیۆنیان لە شارەكانی توركیا و باكووری كوردستان ئەنجامداوە.

ئاماژە بەوەشکراوە، كە لەسەرەتای لەشكركێشی سوپای توركیاوە بۆ سەر شاری عەفرین، تائێستا(٨٥) چالاكی دژی لەشکرکێشییەکە لەلایەن چالاکوانان و هاووڵاتیانەوە ئەنجامدراوە.

لەراگەیندراوەکەدا ئاشکراشکراوە، کە بەهۆی ئەوەی لە تۆڕەکۆمەڵایەتییەکان دژایەتی خۆیان بۆ سوپای تورکیا لەسەر لەشکرکێشیەکەی بۆ سەر عەفرین رایگەیاندووە، (٧٨٦) کەس دەستگیرکراون."

جێی ئاماژەیە (٢٠)ی کانوونی دووەمی ئەمساڵ، سوپای تورکیا لەژێر ناوی ئۆپەراسیۆنی (چڵی زەیتون) هێرشی ئاسمانی و زەمینی بۆ سەر شاری عەفرین لەرۆژئاوای كوردستان دەستپێكرد، ئەوەش کاردانەوەی ناوخۆیی و دەرەکی لێکەوەتەوەو بەشێک لەچین و توێژەکانی ناوخۆی تورکیا دەنگی ناڕەزایەتیان دژی لەشکرکێشیەکانی سوپا بەرزکردووە.