image

PeyamaKurd - Lijneya Bilind a Rûbirûbûna Koronayê ya Herêma Kurdistanê piştî civîna doh 3yê Tebaxê, biryarên nû yên bo pêşîgirtina belavbûna koronayê eşkere kirin.

Li gorî biryaran welatiyên Herêma Kurdistanê dikarin îşev heta demjimêr 24:00an vegerin bajarên xwe, piştî vê dema diyarkirî, rêyên navbera bajaran dê werin girtin û çûnûhatina navbera parêzgehan dê bi destûra Wezareta Navxwe û jûrên operasyonê were kirin.

Berpirsê Bazgehên Hewlêrê Muqedem Selam ragihand; îşev di demjimêr 24:00an de hemû bazgehên Hewlêrê li hemû rêyan werin girtin û ti welatiyekî dê nikaribe ji parêzgehên din ên Herêma Kurdistanê û Iraqê were Hewlêrê, tenê bi destûra Wezareta Navxwe û jûra operasyonan dikarin werin.

Berpirsê Bazgehên Hewlêrê got, îşev piştî demjimêr 24:00an, ji ber ku hemû rê wê girtî bin, bila ti welatiyek dernekeve rê.

Biryarên Wezareta Navxwe yên piştî civîna Lijneya Bilind a Koronayê wiha ne:

1 – Li hemû cihên giştî, divê welatî mask bi kar bînin.

2 – Hemû navendên bijîşkî heta 14 rojan têne girtin.

3 – Cihên giştî, park, kafeterya û çayxane têne girtin.

4 – Holên werzişê, hewûz û klûpên şevan girtî dimînin.

5 – Hemû merasîmên olî û civakî qedexe ne.

6 – Xwaringeh divê xwarinan tenê bigihînin malan.

7 – Hatûçûna di navbera parêzgeh û bajaran de têne rawestandin.

8 – Hatûçûna di navbera Herêma Kurdistanê û Iraqê de heta hefteyekê tê sekinandin.

9 – Hatûçûna dîplomatkarên biyanî û hêzên hevpeymaniyê berdewam e.

10 – Hatûçûna ajans û rêxistinên Neteweyên Yekbûyî berdewam e.

11 – Şofêrên wesayîtan divê mask bi kar bînin.

12 – Li saziyên sektora taybet, divê karmend mask bi kar bînin.

13 – Li derveyî cih û avahiyan divê di navbera mirovan de metreyek û nîv mesafe hebe.

14 -  Kesên vedigerin welat divê soznameyekê îmze bikin ku dê xwe kerentîn bikin.

15 – Deriyê sînorî yê Îbrahîm Xelîl heta hefteyekê dê ji bo geştyariyê were girtin.

16 – Jûra operasyonan û îdareyên serbixwe divê van xalan cîbicî bikin û çavdêriya cîbicîkirina wan bikin.