image

پەیامی کورد    ...    لە یاری كۆتایی پاڵەوانیەتی كوپا ئەمریكا هەڵبژاردەی بەرازیل لە نێو یاریگای ماراكانا و بە ئامادەبوونی هاندەرێكی زۆر ڕووبەڕووی هەڵبژاردەی پیرۆ بوەوە.
لەنیوەی یەكەمی یارییەكەدا لە خولەكی 15 هەڵبژاردەی بەرازیل لە رێگەی ئیڤەرتۆن سۆساوە گۆڵی پێشكەوتنی تۆماركرد، لە خولەكی 44 پائولۆ گێرێرۆ گۆڵی بەرامبەری بۆ پیرۆ تۆمار كردەوە، بەڵام هێندەی نەبرد كە یاریزانانی سامبا لە رێگەی گابرێل خیسۆس گۆڵی دوەمیان تۆماركرد و نیوەی یەكەمی یارییەكە لە بەرژەوەندی یاریزانانی بەرازیل كۆتایهات.
لە نیوەی دوەمی یارییەكەدا یاریزانانی هەڵبژاردەی پیرۆ بە ئاستێكی باش دەركەوتن و بە تەواوی فشاریان خستبوە سەر گۆڵی بەرازیل، بەڵام سەركەوتو نەبون لە تۆماركردنی گۆڵ، هەرچەندە خسۆس بە كارتی سور كرایە دەرەوە، یاریزانانی پیرۆ لە فشارەكانیان بەردەوام بون تا لە خولەكی 90 لە هێرشێكی هەڵگەراوەدا لێدانێكی سزا بۆ بەرازیل گیراو ریچارلسۆن گۆڵی سێیەم و دڵنیای بۆ بەرازیلییەكان تۆماركرد.
سەرئەنجام هەڵبژاردەی بەرازیل یارییەكەی لە بەرژەوەندی خۆی كۆتایی پێهێنا و بە ئەنجامی سێ گۆڵ بەرامبەر بە گۆڵێك سەركەوتنی بەدەستهێناو بۆ جاری نۆیەم لە مێژوی خۆیدا نازناوەكەی بەدەستهێنا.