image

پەیامی کورد      ...    سەرۆكى هه‌رێمى كوردستان و وه‌زیرى كۆچ و كۆچبه‌ران دۆخى ئاواره‌كان تاوتوێ ده‌كه‌ن

پێش نیوه‌ڕۆى ئه‌مڕۆ یه‌كشه‌ممه‌ ٢٦/٧/٢٠٢٠ نێچیرڤان بارزانى، سه‌رۆكى هه‌رێمى كوردستان، پێشوازى له‌ خاتوو ئیڤان فائق جابرو وه‌زیرى كۆچ و كۆچبه‌ر‌انى عێراق كرد.

له‌ دیدارێكدا دۆخى ئاواره‌ و په‌نابه‌ران له‌ كه‌مپه‌كانى هه‌رێمى كوردستان، كاریگه‌ریى بڵاوبوونه‌وه‌ى په‌تاى ڤیرووسى كۆرۆنا و ڕێكاره‌كانى به‌ره‌نگاربوونه‌وه‌ى به‌تایبه‌تیش له‌ناو ئاواره‌ و په‌نابه‌راندا، كار و چالاكییه‌كانى وه‌زاره‌تى كۆچ و كۆچبه‌رانى عێراق له‌ كه‌مپه‌كانى ئاواره‌ و په‌نابه‌ران له‌ هه‌رێمى كوردستان، هاوكارى و هه‌ماهه‌نگی وه‌زاره‌ت له‌گه‌ڵ لایه‌نه‌ په‌یوه‌نداره‌كانى هه‌رێمى كوردستان و چه‌ند پرسێكى دیكه‌یان تاوتوێ كرد.

هه‌ردوولا جه‌ختیان له‌ گرینگی كاركردن بۆ مسۆگه‌ركردنى ئارامى و سه‌قامگیرى و زه‌مینه‌خۆشكردنى گه‌ڕانه‌وه‌ى ئاواره‌كان بۆ سه‌ر زێد و شوێنه‌كانى خۆیان كرده‌وه‌ به‌تایبه‌تیش ئێزدى و مه‌سیحییه‌كان و قه‌ره‌بووكردنه‌وه‌یان، هه‌روه‌ها كاركردن بۆ‌ گێڕانه‌وه‌ى متمانه‌ و ئاوه‌دانكردنه‌وه‌ى شوێنه‌ زیانبه‌ركه‌وتووه‌كانى شه‌ڕى دژى تیرۆر و قووڵكردنه‌وه‌ى پێكه‌وه‌ژیان و لێبورده‌یى له‌نێوان پێكهاته‌ ئایینى و نه‌ته‌وه‌یییه‌كاندا، له‌گه‌ڵ دابینكردنى خزمه‌تگوزارییه‌ گشتییه‌كان و ده‌رفه‌تى كار له‌و ناوچانه‌.