image


پەیامی کورد ... ئەمریکا بڕی ٥٠٠ هەزار دۆلاری بۆ نۆژەنکردنەوەی پەرستگای لالش تەرخانکرد

 

بریكاری میری ئێزدییان بۆ كاروباری گەنجان رایگەیاند، ئەمریكا ٥٠٠ هەزار دۆلاری دیكەی بۆ نۆژەنكردنەوەی پەرستگای لالش تەرخانكردووە.

 

ئەمڕۆ چوارشەممە ٢١ی تەشرینی یەکەم، میر هەرمان میرزا بەگ بریكاری میری ئێزدییان بە ماڵپەڕی فەڕمی پارتی راگەیاندووە، لە ئێستادا قۆناغەكانی نۆژەنكردنەوەی لالش دەستیپێكردووە و هەوڵەكانیش لەلایەن ئێزدییەكان و حكومەت و ئەمریكاوە بۆ نۆژەنكردنەوەی تەواوی پەرستگاكە بەردەوامن.

 

باسی لەوەشکردووە، بە ئامادەبوونی كونسوڵی گشتیی ئەمریكا و راوێژكارە ئێزدییەكانەوە، ئەمریكا ٥٠٠ هەزار دۆلاری دیكەی بۆ نۆژەنكردنەوەی پەرستگای لالش تەرخانكردووە.

 

پەرستگای لالش، دەکەوێتە سنوری قەزای شێخان لە پارێزگای نەینەوا و بە پیرۆزترین شوێنی ئایینی ئێزیدی دادەنرێت لە عێراق و جیهاندا.

 

لە رۆژی ٣ی ئابی ٢٠١٤دا، رێکخراوی چەکداریی داعش هێرشیکردە سەر شەنگال و هەزاران کچ و ژن و منداڵی کوشت و بەدیلگرت، کە تاوەکو ئێستا زیاتر لە سێ هەزاریان رزگارنەکراون و زیانێکی زۆریش بەر پەرستگای لالش کەوت.