image

پەیامی کورد     ...    نێچیرڤان بارزانی جێگری سەرۆکی پارتی دیموکراتی کوردستان، بە بۆنەی ٦٧ەمین ساڵیادی دامەزراندنی رێکخراوەکەیانەوە، پەیامێک ئاڕاستەی یەکێتی ئافرەتانی کوردستان دەکات، و دەڵێ ئەو رێکخراوە خاوەنی مێژوویەکی پڕ سەروەری و تێکۆشانە، ڕۆڵی گرینگ و بەرپرسیارانەی هەبووە لە قۆناغە جیاجیاکانی خەباتی نیشتیمانی و نەتەوەییماندا و، پێشەنگی خەباتی مەدەنی و ڕێکخراوەییە لە کوردستاندا.

دەقی پەیامی نێچیرڤان بارزانی جێگری سەرۆکی پارتی دیموکراتی کوردستان بۆ یەکێتی ئافرەتانی کوردستان:

بەڕێزان سکرتێر و ئەندامانی مەکتەبی سکرتاریەت و ئەنجوومەنی باڵای یەکێتی ئافرەتانی کوردستان..

بە بۆنەی (٦٧)هەمین ساڵیادی دامەزراندنی یەکێتی ئافرەتانی کوردستانەوە، گەرمترین پیرۆزبایی لە خۆتان و کادیر و ئەندامانی یەکێتی ئافرەتانی کوردستان و سەرجەم ئافرەتانی کوردستان دەکەم. هیوای سەرکەوتن و پێشکەوتنی زیاترتان بۆ دەخوازم.

یەکێتی ئافرەتانی کوردستان خاوەنی مێژوویەکی پڕ سەروەری و تێکۆشانە، ڕۆڵی گرینگ و بەرپرسیارانەی هەبووە لە قۆناغە جیاجیاکانی خەباتی نیشتیمانی و نەتەوەییماندا و پێشەنگی خەباتی مەدەنی و ڕێکخراوەییە لە کوردستاندا. ئەم ڕێکخراوە سەنگینە قوتابخانەیەک بووە بۆ پێگەیاندنی چەندین ناو و توانای دیار لە ئافرەتانی تێکۆشەر و قوربانیدەر و سەرکردە لە بواری خەباتی مەدەنی و سیاسی و پەروەردەیی و فەرهەنگی لە کوردستاندا.

ئەو مێژووە دێرینەی یەکێتی ئافرەتانی کوردستان، بەڵگەی هەبوونی بیری یەکسانیخوازی و پێشکەوتنخوازانەیە لە نەهج و بیروباوەڕی پارتی دیموکراتی کوردستاندا هەر لە سەرەتای خەباتی سیاسییەوە، بەڵگەی بڕوابەخۆبوون و زیندوویەتی ئافرەتانی کوردستانیشە لە بینینی ڕۆڵی بەرپرسیارانەیان لە مێژووی گەلەکەماندا.

هەر بەم بۆنەیەوە، دووبارە پشتیوانی تەواوی خۆمانتان بۆ دووپات دەکەینەوە لە خەباتی ڕێکخراوەیی و مەدەنیانەتان بۆ داکۆکیکردن لە ماف و خواستەکانی ئافرەتانی کوردستان و بەهێزکردنی بنەماکانی کولتووری یەکسانی لە کۆمەڵگەی کوردستانیدا.

هیوای سەرکەوتنی زیاتر و پێشکەوتنی بەردەوامتان بۆ دەخوازم.

بەرز و پیرۆز بێت ساڵیادی دامەزراندنی یەکێتی ئافرەتانی کوردستان.

سڵاو بۆ گیانی پاکی شەهیدانی یەکێتی ئافرەتانی کوردستان و سەرجەم شەهیدانی کوردستان.

 

نێچیرڤان بارزانی

جێگری سه‌رۆکی پارتی دیموکراتی کوردستان

١١/١٢/٢٠١٩