image

پەیامی کورد    ...    وەزارەتی تەندرووستی، ھۆشداری داوەتە كۆمپانیاكانی دەرمان كە پابەندی رێنماییەكانی حكوومەت بن و چەندین مەرجیشی بۆ چۆنیەتی مامەڵەكردن بە دەرمان داناوە، گوتەبێژی وازەرەتەكەش دەڵێ، لە دوای سەری ساڵەوە، لێپرسینەوە لەگەڵ ئەو كۆمپانیایانە دەست پێدەكات، كە پابەندی جێبەجێكردنی مەرجەكانی حكوومەت نین.

دكتۆر محەمەد قادر، ووتەبێژی وەزارەتی تەندرووستی، رایگەیاند: "كار بۆ دامەزراندنی دەزگای خۆراك و دەرمان دەكرێت و وەزارەتی تەندرووستی وەك بەشێكی كاریگەر لەو دامەزراوەیە، ڕۆڵی خۆی دەبێت، بەردەوامیش لیژنەكان لە بازاڕ چاودێری ڕەوشی دەرمان دەكەن، لە ڕووی دانانی نرخ و كوالێتی دەرمان و چۆنیەتی گواستنەوە و كۆگاكردنی دەرمان و لیژنەكانی وەزارەتیش سەرقاڵی كارەكانیانن، دواھۆشدارییش دراوەتە كۆمپانیاكانی تایبەت بە دەرمان، كە تا كۆتایی ئەم مانگە پابەندی رێنماییەكان نەبن، سزا دەدرێن".

ووتەبێژی وەزارەتی تەندرووستی دەشڵێت: "ھەر كۆمانپایەكی دەرمان پابەندی بڕیار و ڕێنماییەكانی حكوومەت نەبێت، ئەو كۆمپانیایە دادەخرێت، لە ماوەی یەك مانگیشدا واتە تا كۆتایی ئەم مانگە، پێویستە كۆمپانیاكانی دەرمان پابەندی جێبەجێكردنی ھەموو ئەو مەرجانە بن كە حكوومەت بۆیانی داناوە".

دكتۆر محەمەد قادر ئاماژەی بۆ ئەوەش كرد: "لە ھەرێمی كوردستان ٢٨٠ كۆمپانیای تایبەت بە دەرمان و پێداویستیی پزیشكی ھەن و ژمارەیەك كۆمپانیاش بە ھۆی سەرپێچییەوە سزا دراون، بەڵام ئامارەكان لای كۆالێتی كۆنتڕۆڵی دەرمانن، چوونكە سزادانی كۆمپانیا ھەر داخستن و گرتن نییە، بەڵكوو كەیسیان بۆ دەكرێتەوە و بەپێی سەرپێچی سزایان بۆ دیاری دەكرێت".