image

پەیامی کورد      ...    ئەردۆغان  : لەوانە شەوێک لە پڕدا هێرش بکەینە سەر شەنگال 

سەرۆک کۆماری تورکیا لەبارەی لەشکرکێشی بۆ سەر شەنگال رایگەیاند، "هەمیشە ووتەیەکم، هەیە"، رەنگە شەوێک لە پڕدا بێن.

رەجەب تەیب ئەردۆغان، سەرۆک کۆماری تورکیا ئەمڕۆ هەینی دوای بەجێهێنانی نوێژی هەینی لە مزگەوتی کەرەم ئایدنلار لە ئیستانبوڵ لەبارەی دۆخی شەنگال بە رۆژنامەوانانی راگەیاند، ووڵاتەکەی رەنگە خۆی دەست وەرداتە کاروباری ئەو ناوچەیە، بۆ ئەوەی گەریلاکانی پەکەکە لەو ناوچەیە دەربکات.

لە ووڵامی پرسیاری ئەوەی ئایا ئەو لێدوانە ئاماژەیەکە بۆ ئەنجامدانی ئۆپەراسیۆنی هاوبەش، ئەردۆگان جەختی کردەوە، "لایەنی تورکیا هەمیشە ئامادەیە بۆ ئەنجامدانی ئۆپراسیۆنی هاوبەش، دەستەواژەیەک هەیە هەمیشە دەڵێم، رەنگە شەوێک بە سەرسوڕمانەوە بێین".

٢٠ی ئەم مانگە، خلووسی ئاکار، وەزیری بەرگری تورکیا سەرانی عێراق و پاشان هەرێمی کوردستانی کرد و جەختی لەئامادەباشی تورکیا کردەوە بۆ دابینکردنی پشتیوانی بۆ رووبەڕووبوونەوەی گەریلاکانی پارتی کرێکارانی کوردستان (پەکەکە) لە شەنگال، ئەگەر لەلایەن حکومەتی عێراقەوە داوایان لێبکرێت.

٩ی تشرینی یەکەمی ئەمساڵ بە چاودێری موستەفا کازمی، سەرۆک وەزیرانی عێراق رێککەوتنێک لەنێوان حکوومەتی فیدڕاڵ و هەرێمی کوردستان ئەنجامدرا، بەگوێرەی دەستوور هێزەکانی فیدڕاڵی لە قەزای شەنگال جێگیرکرا و گرووپەکانی دیکە کە قەزاکەدا ناوچەکەیان جێهێشت.