image

   پەیامی کورد  ...  بە گوێرەی هەواڵی ئاژانسەكانی ئابووری لە جیهان بڵاویان كردەوە ئەمڕۆ سێشەممە ٢٣ی ٤ی ٢٠١٩ دوای ئەوەی ویلایەتە یەكگرتوەكانی ئەمریكا ڕایگەیاند، لە ٢ی ئایاری ئەمساڵەوە حكوومەتی واشینتۆن ئەو ووڵاتانە نابەخشێت كە نەوت لە ئێران دەكڕن، نرخی نەوتی خاو لە بازارەكانی جیهاندا بەرزبوونەوەی بەرچاوی بەخۆوە بینی.

كۆشكی سپی ویلایەتە یەكگرتوەكانی ئەمریكا دوێنێ دوشەممە لە ڕاگەیندراوێکدا ڕایگەیاند :  بە بڕیاری دۆناڵد ترامپ، سەرۆكی ئەو وڵاتە چیتر واشینتۆن مووڵەت نادات بە هیچ ووڵاتێك نەوت لە ئێران بكڕێت و ٢ی ئایاری ئەمساڵ دوایین مۆڵەتە بۆ ئەو ووڵاتانەی كە لە ئێستادا لە كڕینی نەوتی ئێران بەردەوامن.

دوا بەدوای ڕاگەیندراوەكەی كۆشكی سپی نرخی نەوتی خاو لە بازارەكانی جیهان بە ڕێژەی لەسەدا 2 بەرزبووەوە و دواتریش ڕێژەكە بۆ بەرزترین ئاستی لەمساڵدا بەرزبووەوە.

بەپێی هەواڵی ئاژانسی ڕۆیتەرز، ئەمڕۆ سێشەممە نرخی نەوتی خاوی برێنت بەرێژەی لەسەدا 0.5 بەرزبووەتەوە و نرخی یەك بەرمیل لەو بەرهەمە كردوویەتیە 74.40 دۆلار لە كۆتا مامەڵەدا، بەوەش لە مانگی تشرینی دوەمی ساڵی ڕابردووەوە تا ئێستا بەرزترین نرخی تۆماركردوە.

هاوكات نرخی یەک بەرمیل نەوتی خاوی تەکساسی ڕۆژئاوای ئەمریکا بەرێژەی لەسەدا 0.5 بەرزبووەتەوە و لە كۆتا مامەڵەیدا نرخی یەك بەرمیل كردویەتیە 65.87 دۆلار و پێش كۆتا مامەڵەی نرخی یەك بەرمیل لەو بەرهەمە گەیشتوەتە 65.89 دۆلار كە بەو ڕێژەیە لە مانگی ئاب-ی ساڵی ڕابردووەوە تا ئێستا بەرزترین ئاستی تۆماركردوە.

پێش ئەوەی ویلایەتە یەكگرتوەكانی ئەمریكا سزاكانی بەسەر ئێراندا بسەپێنێت، ئێران لە رێكخراوی ووڵاتانی وەبەرهێنی نەوت (ئۆپیك)دا، ڕیزبەندی چوارەمین گەورە ووڵاتی وەبەرهێنی نەوتی هەبوو، رۆژانە لانیكەم سێ ملیۆن بەرمیل نەوتی هەناردە دەكرد، بەڵام بەپێی دوایین زانیاریەكان رێژەی هەناردەركردنی نەوتی ئێران لە مانگی نیساندا بۆ یەک ملیۆن بەرمیل لە رۆژێكدا دابەزیوە.