هەسەدە داوا لە نەتەوە یەکگرتووەکان دەکات هێرشەکانی تورکیا ڕابگرێت
هێزەکانی سوریای دیموکراتیک (SDF) داوا لە ئەنجومەنی ئاسایشی نەتەوە یەکگرتووەکان دەکات پێش لە هێرشەکانی تورکیا بۆ سەر عەفرین بگرێت و هەروەها خوازیارە تورکیا پابەند بێت بەو ئاگربەستە سی ڕۆژییەى کە عەفرینیش بەشێکە لێى. کینو گابریل راگەیاند "ئێمە داوا لە نەتەوە یەکگرتووەکان دەکەین پابەندی بڕیارەکەی خوی بێت و بەرپرسیار بێت لە ئاست ئەو بڕیارەی کە داویەتی، هەروەها خوازیارین شێوازێک بۆ چاودێری ئەو پێشەلکاریانەى تورکیا و هاوپەیمانە توندڕۆکانی بدۆزێتەوە و هەرچی زووتر ناچاریان بکات ئەو داگیرکەرییە ڕابگرن و پابەند بن بە ئاگربەستەکە."
پاش پەسەندکردنی ئاگربەستەکە و بەردەوامبوونی هێرشەکانی تورکیا بۆ سەر عەفرین بە بیانوی ئەوەی کە ئەم ئاگربەستە عەفرین ناگرێتەوە، ئەمریکا و ئەڵمانیا و فەڕانسا رایانگەیاند کە ئاگربەستەکە عەفرینیش دەگرێتەوە.
گابریل گوتیشی "تورکیا و هاوپەیمانە توندڕۆکانی، ڕێککەوتنەکەى نەتەوە یەکگرتوەکانیان پێشێل کردووە، تورکیا بە شیوەێکی وەحشیانە ئەو گەڕەکانەی کە خەڵکی سڤیلی لێیە و خزمەتگوزارییەکانی دیکە وەک بۆڕی ئاو بۆمباران دەکات."
ئەنجومەنی ئاسایشی نەتەوە یەکگرتووەکان رۆژی ٢٤ی فێبریوەرى لە سەر داوای کوەیت و سوید ئاگربەستێکی سی رۆژەی بۆ هەموو سوریا و ئەو لایەنەکانی بەشدارن لە ئاڵوزییەکانی سوریا، پەسەند کرد
هەسەدە پێشتر پێشوازی لە ئاگربەستی نەتەوە یەکگرتووەکان کردبوو و پابەندبوونی تەواوی خوێ بەو ئاگربەستە ڕاگەیاندبوو، بەڵام تورکیا و سوریا پێوەى پابەند نەبوونە.