image

PeyamaKurd – Seyda Mele Umadeddîn an bi navê dinê “Gurdilî” ku mexlesa wî ye, demekî bû ku li bajarê Batmanê li nexweşxanê ji ber Kovid-19 ê tedawî dibû. Xebera koça dawiyê ya Seyda Gurdilî şeva borî an ku 4 siet berê li ser medya civakî belav bû. Seyda Mele Umadeddîn bi xwe ji xelkê Misircê (Kurtalan) ji devera Gurdila ye.

Gurdilî piştî damezrandina PDK a Tirkiyê bi partiyê re dixebitî û berya wî jî her li ser rêbaza Barzaniyê mezin dimeşiya û lewra li ser serok Barzaniyê nemir gelek helbestên wî hene. Kes jimara helbestên wî nizane lê yên çapkirî dîwanekî wî heye.

Seyda Gudilî di medreseyên Kurdistanê de xwendiye û li gundên Kurdistanê melatiyê kiriye lê piştî rehmetî Şerafeddîn Elçî di sala 1978 an de li Ankara bû wezîr, seyda xiste Bayındırlık ê û heya xaneşîn bû li wê derê xebitî. 

Em wek PeyamaKurd bi taybet ji gelê Kurd û malbata rehmetî Mele Îmadedîn re sersaxiyê dixwazin. Serê gelê Kurd sax be û Xweda wî bi bihuşta xwe şad bike.

Em helbestvan û seydayê dilsozê Kurd û Kurdistanê Mele İmadedîn bi vê helbesta wî ya nejibîr a bo Barzaniyê nemir nivîsandiye bibîr tînin.

QEHREMANÊ ESRÊ BÎSTA

Qehremanê esra bîsta Mistefa Barzanî tu

Her bijî ey pêşewayê Kurd û Kurdistanî tu

Miletê Kurd te xelas kir em ji bin destê neyar

Ruh û canê min fîda bin melce û amanî tu

Ev welat bo te her daîm minetdare yeqîn

Bi xebata te dimeşî xweş Hekîm Loqmanî tu

Miletê kurd ji Misilman çi Êzidî çi Mesîhî

Ser ji bona te tewandin lew ku xweş însan î tu

Dengê û behsê xerb û şerqê tev pesindarê te ne

Hem welatperwer te dizanin rehberê Kurdan î tu

Lê di pesnê te dinalin sed Cegerxwîn û Hejar

Kes bi mislê te negiha rewneqa cîhanî tu

Ji siyaset çi xeberdin bo te Napolyon xulam

Ji şecaet çi bibêjin Rostemê medanî tu

Ji edalet çi beyan kim Omer û Noşîrewan

Ez ji husna te bibêjim  Yusufê Ken’an î tu

Xof û tirsa te ketiye nav dijminan

Kelemê nav çavê Tirk û Ereb û Îranî tu

Tank û top û tîpên dijmin  tev ji bin îmha dibûn

Hem gelek serdar û serkar girtiyê zindanî tu

Sed wekî Wîlson û Johnson, Şastrî hem Kosîgin

Tev ji tedbîra te mest in karê Pêşmerganî tu

Her bes e ji bo te ew şeref ser û bavê Kurdekan

Cah û mensef tev te berdan da bijî lawanî tu

Lew di bin napalên dijmin tevde borîn emr û dem

Geh li Mahabad û Barzan betlê sê sewranî tu

Hib û hezkirin û evîna te di nav qelbê me de

Em dibin Pêşmerge carek ger ku bê fermanî tu

Ruh û canê xwe telef kin yan hemî azad bibin

Leşker û em nobedar in bo seray û eywanî tu

Aferîn sed aferîn bavê Loqman aferîn

Tu ji bona miletê Kurd bav û hem piştvanî tu

Daw û doza serxwebûnê wî bi alem ragihand

Geh li Parîs geh li London dengê mebûsanî tu

Hêvîdarin em ji Yezdan tu muwefeq bike

Şoreşa te bi ser kevî da bibim mêvanî tu

Hem ji Sêwas ta bi Kermanşah di bin ala te bin

Amed û Farqîn û Batman merkez û seyranî tu

Wa bi ayîna te xemilîn sûk û bajarên welat

Xweş qumandan û serokê Partî Demokratî Kurdistanî tu

Hem li pêş te merasim xwendevan sef bi sef

Leşkerê awaz û bang û ringe ringa topanî tu

Qîz û xortên Kurd reqs û hem dîlan dikin

Bi Gurdilî re dibêjin: Her bijî Barzanî tu

Seydayê Gurdilî (Mele İmadedîn Yetîz)

 

Seydayê Mela İmadeddîn (Seydayê Gurdilî), şairê hêja bi nexweşîya vayrosacorona Covid-9yê li Batmanê (Êlih) ji nav me bar kir. Mala wî hezar caran ava be. Uxira wî ya xêrê be.
Rûhê wî şad be.
Serê hemû malbata wî, nas, dost û hezkiriyên wî sax be.?#Melaİmadeddîn pic.twitter.com/I7sbHY2uY5

— Mehmet Sanrı (@Mihemed) December 2, 2020