image

PeyamaKurd - Endamê polîtburoya YNKê Pavel Talebanî ragihand, di demeke herî nêzîk de em ê posta parêzgarê Kerkûkê werbigrin û tekez kir, ku pêwendiyên YNK û PDKê jî baş in.

Pavel Talebanî ku bi serdanekê çûye Bexdayê, li Koşka Selam a serokomariya Iraqê, derbarê mijarên rojeva Iraqê û Kurdistanê û pêwnediyên navbera partiyên Kurdistanî de ji Rûdawê re axivî.

Pavel Talebanî ragihand, eger Kurd yekrêz û yekgirtî bin, dê bikarin gelek tiştan bi dest bixin û bi yekgirtîbûnê, ti kes û alî nikarin rê li kurdan bigrin û berovajiyê wê eger Kurd yekrêz û yekgirtî nebin, neyar û dijmin dikarin wê yekê weke derfet ji xwe bibînin û derbê li Kurdan bixin.

Talebanî got: “Divê hemû aliyên Kurdistanê bibin yek, bi yekrêzî û yekdengî û bi hev re em hemû partî divê him bergirî li xwe bikin û mafên xwe jî werbigrin li Kerkûkê.”

Derbarê rewşa Kerkûkê de jî Pavel Talebanî got, ew dê di demeke herî nêzîk de parêzgarê Kerkûkê werbigrin û dê rewşa Kerkûkê asayî bibe.

Pavel Talebanî baştirkirin û asayîkirina rewşa Kerkûkê vegerand bo rêkeftina navbera partî û aliyên Kurdistanî û got: “Bila em bi hev re bcivin û li hev bikin, ku Silêmanî aram bibe, em li gel birayên xwe yên di nava PDKê de rûnin, ew tişt hemû dê bêne çareserkirin.”